O poeta Xosé Iglesias, colaborador da sección “Poemas na madrugada” do programa da Radio Galega “Pensando en ti”, pediume dúas colaboracións poéticas gravadas na miña voz para a emisión nocturna do pasado xoves, 26 de abril.
Aquí vos deixo a miña colaboración, entre o minuto 1:30 e 4:50, “Hoxe rétanme as ausencias ” e “Sosteremos o teu voo”, este último en memoria do poeta Paco Souto.
Podedes escoitala nesta ligazón.
Contar ruínas
coas que devastar corpos.
Caligrafarme
Nos labirintos
incompletos da infancia
que eu transitei
Heivos contar
do reflexo do soño
na noite en luz
Desaramar.
Desandar os camiños
ennobelados
Nunca volvemos
ás imaxes completas
que nos transitan
Facendo pé
nos chanzos das raíces
renaceremos
Brindar a pel
a tatuar as nosas
orografías
Ao te agardar
decidín escapar
cara a min mesma
Non lle ter medo
ao tempo das engurras
ter-man-do del
Mercedes Queixas 